“B'hekk nafu li aħna ngħammru fih u Hu fina,
għax tana sehem mill-Ispirtu tiegħu.”
(1 Ġwann 4:13)

Għadna kemm temmejna s-sena 2011 u forsi għal xi uħud minna s-sena li għaddiet kienet waħda li ħalliet magħha mistoqsijiet li baqgħu mingħajr tweġiba. Jista’ jkun illi din is-sena ġdida li għadna kemm bdejna toħloqilna aktar mistoqsijiet li ma nsibux it-tweġibiet għalihom. Madankollu l-Kristjan jista’ jiffaċċja s-sena 2012 b’kuraġġ għaliex hemm affarijiet importanti li nistgħu nkunu nafu mingħajr dubju ta’ xejn.

Tul ix-xhur li ġejjin flimkien ser inħarsu lejn veritajiet mill-Kelma t’Alla li jsaħħulna l-Fidi tagħna u jaċċertawna minn dak li nemmnu. Il-Bibbja taċċertana li nistgħu nkunu nafu ħafna affarijiet li jgħinuna niffaċċjaw l-isfidi li hemm quddiemna fil-mixja Kristjana tagħna tul din is-sena u lil hinn minnha.

Il-President Amerikan Benjamin Franklin kien qal “Xejn ma jista’ ikun ċert ħlief il-mewt u t-taxxi.” Qegħdin ngħixu fi żmien meta anke fost il-Kristjani l-materjaliżmu huwa meqjus importanti anke jekk fir-realtà mhuwiex u ma jimlix il-vojt ta’ qalbna, imma donnhom ftit huma dawk l-affarijiet li jitqiesu bħala tassew bżonnjużi, vera, jew awtoritattivi, dawk il-ħwejjeġ li jħeġġu l-ispirtu tagħna u li jgħinuna fil mixja tagħna.

Fil-Knisja llum insibu li hemm min jaċċetta l-filosofiji tal-bniedem anke jekk dawn imorru kontra l-Iskrittura Mqaddsa, u jwarrbu l-verità tal-Kelma t’Alla.

Imma kif nagħrfu l-verità? U kif nistgħu nkunu nafu li Alla jeżisti tassew? Ġħalkemm l-ħajja nnifisha ħafna drabi tkun inċerta, il-Kristjan jista’ ikun kunfidenti fil-veritajiet dwar Alla li nsibu rivelati fil-Bibbja.

1. NAGĦRFU S-SEWWA

A. Nistħarrġu lis-Spirti (1 Ġwann 4:1-3)

1. Il-Knisja Bikrija kienet tiffaċċja persekuzzjoni minn nies ta’ l-istess kultura u minn fost uħud mill-membri tagħha stess.

2. Kien hemm għalliema foloz li fosthom kien hemm l-ignostiċi li kienu jiċħdu li Kristu kien veru Alla u veru bniedem. Spirtu tal-antikrist.

3. Ġwanni jikteb biex iwissina biex ma nemmnux kull spirtu jew tagħlim sempliċiment għax jidher Reliġjuż. Aħna rridu niddixxernu l-verità mit-tagħlim falz. (1 Ġwann 4:1).

4. Illum irridu noqogħdu attenti dwar dak li naraw fuq it-televixin u dak li naqraw jew naraw fuq l-internet. Irridu noqogħdu attenti ukoll dwar il-fanatiċiżmu li xi uħud mill-aħwa jiktbu fuq l-fb!

5. Għaliex id-duttrina tal-inkarnazzjoni hi daqshekk importanti? Kieku Ġesù kien bniedem biss il-mewta tiegħu kienet tkun waħda ta martri u ma kienitx tista’ tipprovdi s-salvazzjoni. Kieku ma kienx bniedem ma setax imut u jkun is-Salvatur tagħna!

6. Ħafna drabi illum tagħlim falz mill-passat jerġa’ jiġi mqajjem u mlibbes libsa ġdida. Għalhekk importanti li nkunu nafu l-Bibbja biex ma nemmnux il-gideb tax-xitan.

7. Meta xi duttrina tkun t’appella lill-ġisem irridu noqogħdu attenti, anke jekk tkun meħuda mill-Bibbja għax din tista’ tkun interpretazzjoni ħażina!

B. Opri ta’ l-Ispirtu tas-Sewwa (1 Ġwann 4:4-6)

1. Għaliex sar diffiċli ħafna biex nagħrfu s-sewwa mill-gideb?

2. Jekk naqraw l-gazzetti jew nisimgħu l-aħbarijiet huwa ħafna diffiċli biex inkunu nafu min qed jgħid is-sewwa. L-introduzzjoni tal-internet kompliet ħawdet in-nies għax tant hemm infomazzjoni li nistgħu nitfixklu u nintilfu f’dan id-dilluvju ta’ informazzjoni.

3. L-Appostlu Ġwanni jwissina dwar sistema ta’ twemmin fi ħdan is-soċjetà li tkun tmur kontra t-twemmin Bibbliku. Iżda jinkoraġġina billi jgħidilna li dawk li huma mweldin minn Alla għelbu d-dinja u t-twemmin falz, għax l-Ispirtu fina huwa akbar mill-ispirtu li hemm fid-dinja.

4. L-għalliema foloz huma nfushom imqarrqa mix-xitan u jkomplu jgħallmu t-twemmin li huma stess għażlu li jemmnu. Ħafna llum jiġu mqarqa għaliex jaħsbu li rċevew xi rivelazzjoni ġdida u jqisu lilhom nfushom bħala l-vuċi t’Alla. Għalhekk huwa mportanti li nistudjaw l-Bibbja biex ħadd ma jidħaq bina.

5. Dawk li jisimgħu u jirrispondu għal dak li Alla qal fil-Bibbja huma tassew t’Alla (vs. 6).



2. NAGĦRFU ‘l ALLA PERMEZZ TA’ L-IMĦABBA

A. L-Imħabba Tiġi Minn Alla (1 Ġwann 4:7-11)

1. L-imħabba tibda minn Alla u tirrifletti f’uliedu!

2. Ħafna minn dawk li jagħllmu tagħlim falz joħorġu jattakkaw lil kulħadd u jipproġettaw lilhom nfushom bħallikieku huma biss għandhom il-verità sħiħa.

3. Il-Kristjan għandu jwassal il-verità bl-imħabba biex jirbaħ ir-ruħ ta’ dak li jkun u mhux biex jirbaħ argument.

4. Alla tana l-għola eżempju ta’ mħabba meta ta lill-Ibnu u jistenna li aħna la darba nduqu l-imħabba Tiegħu għandna nħobbu lil xulxin bl-istess mod billi nagħtu minn qalbna u mill-aħjar li għandna u mhux mill-fdal jew minn dak li skartajna.

5. L-imħabba hija wisq aktar minn emozzjoni imma hija azzjoni, li nagħtu minna nfusna għal benefiċċju ta’ ħaddieħor.

B. L-Imħabba Tfur Minn Ġo Fina (1 Ġwann 4:12-21)

a. Id-dinja tista’ tara u tagħraf l-imħabba t’Alla permezz tal-Imħabba li tidher fina.

b. Irridu nfittxu l-għajnuna tal-Ispirtu s-Santu. L-Ispirtu s-Santu huwa dak li jiggwidana, jaħdem fina, u jfur minna hekk kif inservu ‘l Alla minn qalbna.

c. Meta xi ħadd jaċċetta lil Ġesù Kristu bħala s-Salvatur personali tiegħu, billi jistqarr li Ġesù hu tassew l-Iben t’Alla, issir bidla f’qalbu. L-Ispirtu t’Alla jibda jgħammar fih.

d. Meta nitwieldu mill-ġdid insiru ulied Alla u naqsmu jew nixxierku fl-istess natura divina tiegħu (2 Pietru 1:4).

Qatt smajt xi Kristjan jgħid, “Jien naf li jien naf li jien naf!”? Dan huwa mod ta’ kif xi uħud jiddeskrivu ċ-ċertezza li Alla jeżisti u li qegħdin f’relazzjoni tajba miegħu. L-Appostlu Pawlu jorbot l-kelma “Nagħrfu jew Nafu” billi għamilha ċara li aħna bħala Kristjani nistgħu nagħrfu s-sewwa mill-ħażin, nistgħu nagħrfu ‘l Alla permezz ta’ mħabbtu, u nistgħu nkunu nafu li aħna ngħammru fih.

Aħna nafu verament x’nemmnu dwar Ġesù? Kapaċi nispjegaw lil ħaddieħor għaliex nemmnu li “Ġesù Kristu ġie fil-ġisem” (1 Ġwann 4:2) u għaliex huwa daqs tant importanti biex ikollna relazzjoni tajba m’Alla?

Aħna verament nafuh ‘l Alla? Jekk iva, għandna nħobbu lill-aħwa. U l-imħabba lejn il-proxxmu turi li aħna verament nimxu wara Kristu.

Aħna nafu li ngħammru f’Alla Hu fina? Nagħmlu dan meta nistqarru “li Ġesù hu l-Iben t’Alla” (vs. 15)u ngħixu fl-imħabba (vs. 16).

Ejjew mela ngħixu ħajja ta’ fidi u mħabba biex tassew ngħidu, “Jien naf li jien naf li jien naf!”